من حواديت الليل فى برمودة
شعر / حمدي عمارة
فى الأحد 28/4/2019
مين اللى مَحبِّش
فى ” برمهات ”
وغزل على نول الصبر الطايل
توب للفرحة فى ” برمودة
بعد ” المدخول ” ؟!
واندار “ع” الليل
الليل الموشوش بالدحكة
على شد الحيل
يقف على راس القمرة البـِـــكْر
عشان تسهر
وتخلى العواييل
ما تروِّح تنعس
إلا اما يجيبوا أوان الطرح
فى كفوف اللقا
من غير موسم …
أنا كنلى ومواعيد الفرحة
المطرح يقرب …
ويمد النور فى صوانى الشمع
لأقرب وش
– اخترته يكون ونس الليلة –
اندار على عينى و وشوشها
“ب ” مساء النور
أنا من عمنوَّل
باستنى نزف الموعود …
ونقرب خطوة عن الأول
لو كانت حتى فى ” بؤونة ”
نفشى المستور
لكن ولا حل عليا الدور
أصل أنا وقليل البخت خوات
موعودة نجوم الليل
بالعَدّ “ف” مقاطيفى
أخلُب …
وارجع فى الحسبة من الأول
أخـْــلِىْ المقاطيف
لا اشتكت القسمة
ولا اندارت روس امتى … ؟
وكيف …. ؟
فى جداول الضرب
وونيسة القلب
اللى ما كَلِّت تطرق بابه
على رنة خلاخيل النورج
فى جرون ” تفرج “
ملِّت “م” الشعر وقوَّاله
ولِّت للمطرح زفة ” فوووت … “
لا “ف” مسرى …
ولا فى بشاير ” توت ” …
الليل “ح” يرجِّع مواله ! .